ەل بولاشاعىنىڭ جارقىندىعى جولىندا ءار قازاقستاندىق قوعامدا ورىن الىپ جاتقان رەفورمالاردىڭ ءمانىن جەتە ءتۇسىنىپ، ونى وتانىمىزدىڭ دامۋىنا جۇيەلى تۇردە قولدانا ءبىلۋى ءتيىس. وسى ورايدا ەلباسى ءوز جولداۋىندا «رۋحاني جاڭعىرۋ» باعدارلاماسىنا باسا ماڭىز بەرۋدى تاپسىردى.
وتكەن جىلى قولعا الىنعان وسىناۋ باستامانى ءارى قاراي جالعاستىرىپ قانا قويماي، ونىڭ اياسىن جاڭا مازمۇنمەن جانە باعىتتارمەن تولىقتىرۋ قاجەتتىگىن العا قويۋى قۇپتارلىق. «جاستار مەن وتباسى ينستيتۋتىن كەشەندى قولداۋ مەملەكەتتىك ساياساتتىڭ باسىمدىعىنا اينالۋعا ءتيىس. جاستاردىڭ بارلىق ساناتىن قولداۋعا ارنالعان شارالاردى تولىق قامتيتىن الەۋمەتتىك ساتىنىڭ اۋقىمدى پلاتفورماسىن قالىپتاستىرۋ كەرەك» دەگەن نۇرسۇلتان ءابىش ۇلىنىڭ تاپسىرماسى وتباسىنداعى قۇندىلىقتاردى ارتتىرۋعا دا اكەلىپ تىرەلەدى.
مەملەكەت باسشىسى ايتقانداي، ەگەر جاڭعىرۋ ەلدىڭ ۇلتتىق-رۋحاني تامىرىنان ءنار الا الماسا، ول اداسۋعا باستايدى. سوندىقتان، كونە داۋىرلەردەن باستاۋ الاتىن، ءوزىنىڭ تاريحي تاجىريبەسىنەن، يگى سالت، ىزگى داستۇرلەرىنەن مۇلدەم قول ۇزگەن قوعامدا جاڭعىرۋ نەمەسە جاڭارۋ مۇمكىن ەمەس. حالقىمىزدىڭ وسىنداي تامىرى تەرەڭگە كەتكەن، تاريحىمەن بىرگە جالعاسىپ كەلە جاتقان رۋحاني بايلىقتارىنىڭ ءبىرى – وتباسى قۇندىلىقتارى. ءتىپتى ءبىزدىڭ رۋحاني قۇندىلىقتارىمىزدىڭ نەگىزى دە وسى وتباسىلىق داستۇرىمىزدە جاتىر ەمەس پە؟! ولاي بولسا، ءار ادام ءوز جانۇياسىنداعى بالا تاربيەسىنە ەرەكشە دەن قويىپ، ولاردىڭ سانالى دا، ءبىلىمدى ازامات بولىپ قالىپتاسۋىنا جاعداي جاساۋدا بويلارىنا ۇلتتىق قۇندىلىقتارىمىزدى قاتار ءسىڭىرتۋى قاجەت-اق.
«ىنتىماقتى ەلدىڭ ىرىسى مول» دەمەكشى، تاۋەلسىز ەلدە بىرلىگىمىز بەن ىنتىماعىمىزدى ساقتاساق، ءبىزدىڭ الار اسۋلارىمىز بۇگىنگىدەن دە بيىك بولارى ءسوزسىز. وسىناۋ جايتتاردى ءار وتباسىندا بالا ساناسىنا سىڭىرۋگە ءار اتا-انا ۇلەس قوسۋى ماڭىزدى. جولداۋدا ايتىلعان بۇل سوزدەرگە جاي عانا كوز جۇگىرتپەي، استارىنا زەرە سالا ءۇڭىلۋدىڭ ءمانى بولەك. ولاي بولسا، ءار ۇرپاقتىڭ ساناسىنا تۋىپ وسكەن جەرىنىڭ تاريحىن ءسىڭىرىپ وتىرۋ –جانۇياداعى ۇلكەندەردىڭ مىندەتى. وسى ورايدا «مەرەيلى وتباسى» ۇلتتىق بايقاۋىنىڭ جەڭىمپازى رەتىندە ايتارىم، ءار بالا اتانىڭ قانى مەن انانىڭ سۇتىمەن كەلەتىن ءتۋابىتتى قاسيەتتەر سەكىلدى ۇلتتىق رۋحاني قۇندىلىقتاردى دا ەڭ الدىمەن وتباسىندا اتا-انانىڭ تاربيەسىمەن بويىنا سىڭىرەتىنى انىق.
پىكىر قالدىرۋ